Isang dambuhalang buwaya na nagdudulot ng pangamba sa mga residente ang nalambat sa Palawan.
 |
| Image from PWRCC Facebook page |
Sa wakas ay makahihinga na nang maluwag ang mga residente ng Barangay Pulot Shore sa bayan ng Sofronio Española, Palawan dahil nahuli na rin ang matagal na nilang kinatatakutan na isang dambuhalang saltwater crocodile.
Noong buwan ng Agosto ng kasalukuyang taon pa umano ini-report ng mga residente at opisyal ng barangay sa Palawan Council for Sustainable Development Staff (PCSDS) at Palawan Wildlife Rescue Conservation Center (PWRCC) ang malaking buwaya na madalas mamataan sa baybayin ng Sumpaka River.
Nagsagawa ang mga tauhan ng pinagsanib na puwersa ng PCSDS at PWRCC ng monitoring at inspection sa lugar kung saan madalas makita ang buwaya. Nagsagawa na rin sila ng information, education at communications campaign para sa mga residente upang mabigyan ang mga ito ng kaalaman tungkol sa wildlife.
 |
| Image from PWRCC Facebook page |
Matapos ang isinagawang pag-iinspeksyon ay agad namang nakumpirma ng mga awtoridad ang report na ipinarating sa kanila na madalas makitang pahila-hilata sa riverside ang buwaya na may scientific name na Crocodylus porosus.
Sa ilalim ng PCSDS Resolution No.15-521, ang Crocodylus porosus ay kabilang sa “critically endangered species.”
Ikinasa agad ang paghuli sa buwaya dahil natugunan ang mga requirements para magsagawa ng isang extraction procedure. Una, madalas iyong makita malapit sa tirahan ng mga tao. Ikalawa, namataan iyon kahit hindi naman egg-laying season at ikatlo, ang haba niyon ay higit sa sampung talampakan.
 |
| Image from PWRCC Facebook page |
Sinimulan noong ika-9 ng Nobyembre ang pag-trap sa buwaya at noong ika-14 ng Nobyembre ay tagumpay nila iyong nalambat. Nang sukatin ay umabot sa 14.8 feet ang haba ng naturang reptile.
Ang buwaya na pinangalanang “Corona pulot shore” ay dinala sa pasilidad ng PWRCC upang doon iyon mapangalagaan nang maayos.
 |
| Image from PWRCC Facebook page |
Hinihikayat ng PWRCC ang sinuman na mangyaring makakita, makahuli o makapagligtas ng wildlife na agad ipaalam o i-turn over iyon sa kanilang tanggapan na may hotline numbers na 0935-116-2336 at 0948-937-2200.
Maaari rin umanong magpadala ng mensahe sa kanilang official Facebook page.
COMMENTS