Imee inaming nasaktan ang pamilya Marcos sa ‘reaction’ ni PRRD sa BBM-Sara tandem

‘Heartbroken’-- ito ang naging paglalarawan ni Imee sa naramdaman ng pamilya Marcos matapos ang hindi pagsang-ayon ni PRRD sa tambalang Bongbong-Sara.

‘Heartbroken’-- ito ang naging paglalarawan ni Senador Imee Marcos sa naramdaman ng kanilang pamilya matapos ang hindi pagsang-ayon ni Pangulong Rodrigo Duterte sa tambalang Bongbong Marcos-Sara Duterte-Carpio para sa darating na national election.

Ayon sa senadora, na panganay na kapatid ni Bongbong, masakit para sa kanila ang narinig mula sa Pangulo lalo pa’t hindi naman sila magkaaway sa pulitika.

"Frankly, we were heartbroken by the almost violent reaction of the President," ani Imee sa isang panayam kamakailan.

Imahe mula sa PCOO

"We are not the enemy. That is very, very clear. We’ve been allies, we’ve been supporters, and it goes way back," dagdag pa ng mambabatas.

Kung matatandaan, inihayag ni Pangulong Duterte ang kaniyang pagtutol sa pakikipagtambalan ng kaniyang anak kay Bongbong na inilarawan niyang isang ‘spoiled brat’ at ‘weak leader’.

Dahil dito, hindi umano siya bilib sa kakayahan ng anak ng yumaong Pangulong Ferdinand Marcos.

Imahe mula sa The New York Times

“Hindi ako bilib sa kanya. He is really a weak leader… Totoo ‘yan, hindi ako naninira ng tao. Talagang weak, kasi spoiled child, only son,” ani Duterte sa isang talumpati.

“Of course he can talk, he delivers English, ma-articulate… Pero sabihin mo may crisis ganoon, he’s a weak leader, at saka may bagahe siya. ‘Yan sinasabi ko sa inyo, totoo ‘yan,” dagdag pa ng presidente.

Si Senador Christopher ‘Bong’ Go ang itinutulak ni Duterte para lumaban sa pagka-pangulo matapos ideklara ni Mayor Sara na pagka-bise presidente ang kaniyang tatakbuhan.

Imahe mula sa VOA News

Kamakailan ay pormal nang inanunsiyo ng Lakas-CMD ni Mayor Sara ang pakikipag-alyansa nila sa kampo ni Bongbong Marcos. Ang alyansang ito ay sinusuportahan din ng mga dating pangulong sina Joseph ‘Erap’ Estrada at Gloria Macapagal-Arroyo.

Kasunod naman nito ang pag-anunsyo ni Go na aatras na siya sa presidential race dahil hindi pa umano niya panahon bukod pa sa tutol ang sariling pamilya sa kaniyang naging unang desisyon.

Si Senador Imee Marcos ay kilalang malapit kay Inday Sara at bago pa man ang filing ng COC ng mga kandidato ay ilang beses na ring napaulat na nagpunta sa Davao City para kausapin ang panganay na anak ni Pangulong Duterte.