PDP-Laban posibleng mag-adopt na lamang ng kandidato matapos ang pag-atras ni Bong Go

Dahil hindi na maaari ang substitution, wala umanong natitirang option ang PDP-Laban kung hindi ang mag-adopt na lamang ng isang kandidato.

Dahil hindi na maaari ang substitution, wala umanong natitirang option ang PDP-Laban Cusi Wing kung hindi ang mag-adopt na lamang ng isang kandidato sa pagkapangulo para sa darating na halalan sa 2022.

Ganito ang naging paliwanag ni Cabinet Secretary Karlo Nograles na siya ring executive vice president ng faction ng PDP-Laban na pinamumunuan ni nergy Secretary Alfonso Cusi.

"Wala nang substitution number 1 so technically speaking dahil wala pong substitution, ang option namin is to adopt," ani Nograles sa naging panayam ng Headstart.

Sec. Karlo Nograles| Screenshot mula sa Headstart video

Sa kasalukuyan, nagsasagawa na ang partido ng 'series of meetings' upang pag-usapan ang kanilang susunod na hakbang sa mga darating na araw.

Tumanggi naman si Nograles na kumpirmahin kung ang tandem nina dating senador Bongbong Marcos at Davao City Mayor Sara Duterte-Carpio ang kanila nang susuporthan dahil na rin sa pag-atras ni Senador Bong Go na standard-bearer sana ng kanilang partido.

“Let’s wait for the statement ng PDP-Laban and the decision ng partido because we have not yet made that decision… kasi kailangan dumaan din sa proseso iyan,” ayon sa kalihim.

Imahe mula sa Facebook| Bongbong Marcso for 2022

Ayaw ring magsalita muna ni Nograles kung ikinukunsidera ng partido sina Manila Mayor Isko Moreno, o maging si Senador Manny Pacquaio, bilang posibleng ieendorso nila sa pagka-pangulo.

“Again ayaw kong pangunahan ang PDP-Laban kasi mag-uusap pa kami, at magdedesisyon pa kami,”  paliwanag ng opisyal.

Matatandaang nitong Martes, Nobyembre 30, ay pormal nang inanunsiyo ni Go ang kaniyang pag-atras sa presidential race bunsod na rin umano ng pagtutol ng kaniyang pamilya at mga kaanak.

BASAHIN: Hindi pa niya panahon: Sen. Bong Go umatras sa presidential race

"Napakahirap kung pasan-pasan mo habang nangangampanya ka ay nagre-resist ang pamilya mo, ang puso mo, ang isipan mo, paano ka makakapagkampanya nang mabuti? Kaya ang sabi ko marahil po ay hindi ko pa po panahon," ayon sa senador.

Imahe mula sa Facebook| Bong Go

Paliwanag pa ni Go, na inamin ding wala naman talaga siyang ambsiyong mag-presidente, ayaw niyang mahirapan pa si Pangulong Rodrigo Duterte sa pangangampanya para sa kaniya lalo pa’t ito ay may edad na at mahina na rin ang katawan.

Sa ngayon, pinag-uusapan pa umano nila ng Pangulo kung sino ang kandidatong susuportahan nila basta umano ito ay iyong magpapatuloy ng mga programang nasimulan ng kasalukuyang administrasyon.