OCTA: Bilang ng kaso ng COVID, posibleng bumaba pa sa 500 kada araw bago mag-Pasko

Posibleng umabot na lang sa 500 o mas mababa pa ang bilang ng kaso ng COVID-19 sa bansa kada araw bago dumating ang araw ng Kapaskuhan.

Posibleng umabot na lang sa 500 o mas mababa pa ang bilang ng kaso ng COVID-19 sa bansa kada araw bago dumating ang araw ng Kapaskuhan, ayon sa OCTA Research Group.

Ito ay kung patuloy umano ang magiging trend ng pagbaba ng COVID cases na naitatala bawat araw nitong mga nagdaang linggo tulad nitong Martes, Nobyembre 30, na mayroon lamang naiulat na nasa 425 panibagong kaso.

"Baka nga bumaba pa to less than 500 by Christmas. Sa Metro Manila, baka bumaba pa to less than 100 na lang. Kasi talagang parang nawawala na. Parang nag-vanishing act na lang 'yung Delta bigla," ani Dr. Guido David ng OCTA sa panayam ng TeleRadyo.

Dr. Guido David, OCTA| Imahe mula sa PNA

Bukod dito, baka nga maibaba na rin daw sa Alert Level 1 na lamang ang National Capital Region (NCR) kung wala lamang panibagong banta ng Omicron variant.

"Kung wala tayong banta ng Omicron, puwede na tayo magbaba sa Alert Level 1 kasi sobrang baba na ng bilang ng kaso natin. Parang nawawala na 'yung virus. Hindi tayo nagkakaroon ng spike ng cases kahit nagluwag na tayo," ayon pa kay Dr. David.

Imahe mula sa Facebook| DOH

Sa kasalukuyan, mayroon na lamang 15,327 aktibong kaso ng COVID sa bansa mula sa kabuuang 2,833,038 na nagkasakit; nasa 2,768,999 sa mga ito ay gumaling na.

Iwas na muna sa Christmas party

Sa kabila nito, nagbabala pa rin ang isang infectious diseases expert sa publiko na iwasan na muna ang mga pagtitipon gaya ng Christmas party ngayong panahon ng Pasko.

Ito ay dahil na rin sa banta ng Omicron variant na hanggang sa ngayon ay pinag-aaralan pa rin ng mga siyentipiko kung ito ba ay mas mapanganib sa Delta variant o hindi.

"We need more information about the Omicron variant of concern. When we do activities that increase our risk of getting the infection—one of that is the Omicron variant—we have to be careful,” paliwanag ni Dr. Rontgene Solante, hepe ng Adult Infectious Diseases and Tropical Medicine unit ng San Lazaro Hospital.

Ayaw man umano niyang maging ‘killjoy’, subalit mas makabubuti raw na iwasan na muna ang mga party o pagtitipon ngayong Christmas season.

Imahe mula sa Al Jazeera

Wika pa ni Dr. Solante, bagama’t wala pang naitatalang kaso ng Omicron variant sa Pilipinas, baka naman mabulaga muli tayo pagdating ng Enero at biglang magkaroon uli ng surge.

“That’s something that we don’t like to happen, especially us healthcare workers. Pagod na talaga kami and when we have a surge again, I don’t know what will happen to us," ayon pa kay Solante.